بالتخبية..”من الكازو إلى الضص” المركب السوسيو رياضي بالحي الحسني نمودجا
الداخلة مباشر-علي أيت سيدي
شباب خرجاتهم الغيرة من دائرة الصمت..الغيرة على لمدينة ديلنا كاملين وعلى الجمالية ديلها وعلى حق وليداتنا من المرافق العمومية لي فيها ولي في الاصل مديورة لينا كاملين ومخلصينها من فلوسنا كاملين (المال العام)
بالتخبية هاد السيمانة لي دازت بانو شي بناية كيطلعو شي حيوطة في تيران القرب لي بين الحي الحسني وحي الوكالة بلا تاشي أفيش تيكنيك (بطاقة تقنية) لي كاتعرف المشروع شنو غايدار فيه وبواحد العشوائية بدات أشغال البناء…طبعا الشباب ديلنا ماتسرطاتش ليه وناضو تحركو ودارو داكشي لي خصو يدار وتم توقيف الأشغال في الحين وتم هدم وإلغاء داك الحيوطة لي بداو كيتبناو (صورة لي مافيها لبريك هاديك را ديل بعد تدخل الشباب)…
داك الݣرياج تاهو كان غادي يحيدوه ويطلعو بلاصتو حيط…مابغيناش نظلمو تاشيواحد ولكن هاد الاشغال ماشي بريئة لأنها ماخداتش صبغة عمومية وكأن لي عطا لبريكول كيبني فشي حوش فشي زريبة ديلو…
آخر الأخبار لي كتروج وكانتمنى تكون غالطة أن هاد التيران كانو فيه جوج حلبات ديل الكورة لي كان كازو عشب اصطناعي غايردوهم ضص يعني غايتم تبليطهم بالسيما والكياس … وأخبار أخرى تاهي كانتمنى تكون غالطة كاتقول أن تيران واحد غيدار بالكازو ولاخور غايديروه بالضص …
فكرة ديل الضص ماقبلوهاش الساكنة ولوليدات لي كيترينيو في هاد المركب ديل القرب ولي هو المتنفس الوحيد ديل الحي الحسني وحي الوكالة لي كيلعبو فيه وليداتهم …
الفكرة ديل الضص مرفوضة تماما من طرف الساكنة وهادا مجرد تنبيه مسبق لمن يهمه الأمر الى كانت هاد الفكرة ديل الضص كاضور ليه فس دماغو من أحسن غير ينساها ويرد التيران كيما كان جوج حلبات يرد ليهم الكازو إما جديد إما يرد ليهم غار داك لقديم لي كان وخا مشروط هانيا قاضين بيه الغرض …
للتاريخ .. الوزير ديل الشباب والثقافة ملي جا للداخلة في بداية هاد الشهر قالو ليه (الساكنة ) انهم رافضين الضص في هاد التيران وان الكازو خاصو يرجع لبلاصتو وماخاصش يكون الضص … حيت التجربة ديل الضص دازو منها في التران لي مبني حاليا فوقو جامع لي معروف بجامع سي حميد بين هاد جوج احياء ولي حداه السويقة ديل الخضرة…
الوزير قال للساكنة ان الضص مابقاش كيدار في ملاعب القرب ولكن هاد الاخبار لي كتروج حاليا بخصوص هاد التيران تثير الغضب ونتمناو تكون مجرد إشاعات.